soz-e-dil-o-jaan aur hai saz-e-dil-o-jaan aur

soz-e-dil-o-jāñ aur hai sāz-e-dil-o-jāñ aur

ehsās-e-bayāñ aur hai idrāk-e-nihāñ aur

duniyā-e-mohabbat meñ zamīñ aur zamāñ aur

ik sho.ala-ba-jāñ naġhma-kunāñ rāz-e-nihāñ aur

shā.ir kā jahāñ aur hai shātir kā jahāñ aur

mafhūm mohabbat kā yahāñ aur vahāñ aur

ai chāñd kī maflūj fazāoñ ke musāfir

hai muntazir-e-dīd abhī bazm-e-jahāñ aur

ḳhud mahv-e-tamāshā haiñ mah-o-mehr-o-kavākib

hai ādam-e-ḳhākī tirī manzil kā nishāñ aur

kuchh duur hujūm-e-ġham-e-jānāñ se nikal jā

ai ashk-e-ravāñ sho.ala-e-jāñ barq-e-tapāñ aur

ye nuz.hat-o-nik.hat kā tabassum vo tasādum

ye abr-e-karam aur hai aahoñ kā dhuāñ aur

tujh ko ġham-e-jānāñ ġham-e-daurāñ se badal duuñ

hai azm-e-javāñ aur zamāñ aur samāñ aur

sarmāya-e-hastī thā kabhī josh-e-taġhazzul

ehsās-e-junūñ aur thā andāz-e-bayāñ aur

kyā ye bhī zamāne kā koī turfa asar hai

hai terī 'azīz' aaj zabāñ aur bayāñ aur

soz-e-dil-o-jaan aur hai saz-e-dil-o-jaan aur

ehsas-e-bayan aur hai idrak-e-nihan aur

duniya-e-mohabbat mein zamin aur zaman aur

ek shoala-ba-jaan naghma-kunan raaz-e-nihan aur

shair ka jahan aur hai shatir ka jahan aur

mafhum mohabbat ka yahan aur wahan aur

ai chand ki mafluj fazaon ke musafir

hai muntazir-e-did abhi bazm-e-jahan aur

KHud mahw-e-tamasha hain mah-o-mehr-o-kawakib

hai aadam-e-KHaki teri manzil ka nishan aur

kuchh dur hujum-e-gham-e-jaanan se nikal ja

ai ashk-e-rawan shoala-e-jaan barq-e-tapan aur

ye nuzhat-o-nikhat ka tabassum wo tasadum

ye abr-e-karam aur hai aahon ka dhuan aur

tujh ko gham-e-jaanan gham-e-dauran se badal dun

hai azm-e-jawan aur zaman aur saman aur

sarmaya-e-hasti tha kabhi josh-e-taghazzul

ehsas-e-junun aur tha andaz-e-bayan aur

kya ye bhi zamane ka koi turfa asar hai

hai teri 'aziz' aaj zaban aur bayan aur