سوز فراق نے ہے لگائی بدن میں آگ

سوز فراق نے ہے لگائی بدن میں آگ

مجھ کو یقین ہے کہ لگے پیرہن میں آگ

ہر شاخ میں ہے جلوۂ شاخ نہال طور

بھڑکائی ہے یہ آتش گل نے چمن میں آگ

ہنگام ضرب تیشہ سے جس کا ظہور تھا

شیرین کے غم کی تھی وہ دل کوہ کن میں آگ

ہم سے ہو ضبط آہ شرربار کس طرح

اس نے تو پھونک دی جگر و جان و تن میں آگ

اس شعلہ رو کے عارض رنگیں کے عکس نے

چمکائی گوشوارۂ در عدن میں آگ

اس رشک مہر کے لب رنگیں کو دیکھ کر

غیرت سے لگ اٹھی دل لعل یمن میں آگ

بیگنؔ ہمارے نالۂ سوزاں سے دیکھنا

اک دن لگے گی سقف سپہر کہن میں آگ