soz-e-firaq ne hai lagai badan mein aag

soz-e-firāq ne hai lagā.ī badan meñ aag

mujh ko yaqīn hai ki lage pairahan meñ aag

har shāḳh meñ hai jalva-e-shāḳh-e-nihāl-e-tūr

bhaḌkā.ī hai ye ātish-e-gul ne chaman meñ aag

hangām-e-zarb-e-tesha se jis kā zuhūr thā

shīrīn ke ġham kī thī vo dil-e-kohkan meñ aag

ham se ho zabt āh-e-sharar-bār kis tarah

us ne to phūñk dī jigar-o-jān-o-tan meñ aag

us sho.ala-rū ke āriz-e-rañgīñ ke aks ne

chamkā.ī goshvāra-e-durr-e-adan meñ aag

us rashk-e-mehr ke lab-e-rangīñ ko dekh kar

ġhairat se lag uThī dil-e-la.al-e-yaman meñ aag

'be-gun'' hamāre nāla-e-sozāñ se dekhnā

ik din lagegī saqf-e-sipahr-e-kuhan meñ aag

soz-e-firaq ne hai lagai badan mein aag

mujh ko yaqin hai ki lage pairahan mein aag

har shaKH mein hai jalwa-e-shaKH-e-nihaal-e-tur

bhaDkai hai ye aatish-e-gul ne chaman mein aag

hangam-e-zarb-e-tesha se jis ka zuhur tha

shirin ke gham ki thi wo dil-e-kohkan mein aag

hum se ho zabt aah-e-sharar-bar kis tarah

us ne to phunk di jigar-o-jaan-o-tan mein aag

us shoala-ru ke aariz-e-rangin ke aks ne

chamkai goshwara-e-durr-e-adan mein aag

us rashk-e-mehr ke lab-e-rangin ko dekh kar

ghairat se lag uThi dil-e-lal-e-yaman mein aag

'be-gun hamare nala-e-sozan se dekhna

ek din lagegi saqf-e-sipahr-e-kuhan mein aag