soz-e-gham ko ba’is-e-taskin-e-jaan kaise kahen

soz-e-ġham ko bā’is-e-taskīn-e-jāñ kaise kaheñ

mauj-e-sarsar ko nasīm-e-gul-fishāñ kaise kaheñ

jo sitam-pesha hai kyā us ke karam kā e'tibār

nāvak-e-ḳhūnīñ ko shāḳh-e-āshiyāñ kaise kaheñ

ye sharāb-o-she’r-o-naġhma ye javānī ye jamāl

‘umr-e-fānī ko matā’-e-rā.egāñ kaise kaheñ

jis ko ho kāñToñ se nafrat phuul hoñ jis ko 'azīz

us ko gulshan kā haqīqī bāġhbāñ kaise kaheñ

jis ke tinke kar rahe hoñ bijliyoñ se sāz-bāz

us nasheman ko faroġh-e-gulsitāñ kaise kaheñ

jo haqīqat hai use bātil samajh leñ kis tarah

kārvāñ ko ham ġhubār-e-kārvāñ kaise kaheñ

har kalī meñ bekalī har phuul meñ pazhmurdagī

is ḳhizāñ ko ham bahār-e-jāvedāñ kaise kaheñ

āñsuoñ par aah par nāloñ pe haiñ pābandiyāñ

be-zabāñ ab dard-e-dil kī dāstāñ kaise kaheñ

zindagānī ik musalsal kashmakash kā naam hai

zindagānī ko sukūn-e-qalb-o-jāñ kaise kaheñ

ek do afrād ke milne se kab bantī hai qaum

ek do qatroñ ko bahr-e-bekarāñ kaise kaheñ

zindagānī ik haqīqat hai nahīñ ye vahm-o-ḳhvāb

aag hai ye aag hai is ko dhuāñ kaise kaheñ

daur-e-āzādī meñ 'rā'nā' soz-e-mahkūmī kahāñ

sub.h-e-sādiq ko añdhere kā samāñ kaise kaheñ

soz-e-gham ko ba’is-e-taskin-e-jaan kaise kahen

mauj-e-sarsar ko nasim-e-gul-fishan kaise kahen

jo sitam-pesha hai kya us ke karam ka e'tibar

nawak-e-KHunin ko shaKH-e-ashiyan kaise kahen

ye sharab-o-she’r-o-naghma ye jawani ye jamal

‘umr-e-fani ko mata’-e-raegan kaise kahen

jis ko ho kanTon se nafrat phul hon jis ko 'aziz

us ko gulshan ka haqiqi baghban kaise kahen

jis ke tinke kar rahe hon bijliyon se saz-baz

us nasheman ko farogh-e-gulsitan kaise kahen

jo haqiqat hai use baatil samajh len kis tarah

karwan ko hum ghubar-e-karwan kaise kahen

har kali mein bekali har phul mein pazhmurdagi

is KHizan ko hum bahaar-e-jawedan kaise kahen

aansuon par aah par nalon pe hain pabandiyan

be-zaban ab dard-e-dil ki dastan kaise kahen

zindagani ek musalsal kashmakash ka nam hai

zindagani ko sukun-e-qalb-o-jaan kaise kahen

ek do afrad ke milne se kab banti hai qaum

ek do qatron ko bahr-e-bekaran kaise kahen

zindagani ek haqiqat hai nahin ye wahm-o-KHwab

aag hai ye aag hai is ko dhuan kaise kahen

daur-e-azadi mein 'ra'na' soz-e-mahkumi kahan

subh-e-sadiq ko andhere ka saman kaise kahen