سوز جگر کا حال کسی پر عیاں نہ ہو

سوز جگر کا حال کسی پر عیاں نہ ہو

جلتا رہوں اس آگ میں لیکن دھواں نہ ہو

پتھر وہ دل ہے جو نہ ہو تیرا اسیر زلف

وہ آنکھ کیا جو تیرے لئے خوں چکاں نہ ہو

اوروں کی طرح جلوۂ دیدار کے لئے

یا رب مجھے قیود زمان و مکاں نہ ہو

میری زبان حال مرا ترجماں بنے

خودداریوں پہ منت نطق و بیاں نہ ہو

آنے کو لب پہ شکوۂ جور و جفا ہو جب

اس دن خدا کرے مرے منہ میں زباں نہ ہو

واعظ رہین کعبہ برہمن ہے وقف دیر

تم جلوہ گر بتاؤ کہاں ہو کہاں نہ ہو

کیا شستگی ہو اس کے مضامین میں جلالؔ

جس کو نصیب صحبت اہل زباں نہ ہو