soz-e-jigar ka haal kisi par ayan na ho

soz-e-jigar kā haal kisī par ayaañ na ho

jaltā rahūñ us aag meñ lekin dhuāñ na ho

patthar vo dil hai jo na ho terā asīr-e-zulf

vo aañkh kyā jo tere liye ḳhūñ-chakāñ na ho

auroñ kī tarah jalva-e-dīdār ke liye

yā-rab mujhe quyūd-e-zamān-o-makāñ na ho

merī zabān-e-hāl mirā tarjumāñ bane

ḳhuddāriyoñ pe minnat-e-nutq-o-bayāñ na ho

aane ko lab pe shikva-e-jaur-o-jafā ho jab

us din ḳhudā kare mire muñh meñ zabāñ na ho

vaa.iz rahīn-e-ka.aba barahman hai vaqf-e-dair

tum jalva-gar batāo kahāñ ho kahāñ na ho

kyā shustagī ho us ke mazāmīn meñ 'jalāl'

jis ko nasīb sohbat-e-ahl-e-zabāñ na ho

soz-e-jigar ka haal kisi par ayan na ho

jalta rahun us aag mein lekin dhuan na ho

patthar wo dil hai jo na ho tera asir-e-zulf

wo aankh kya jo tere liye KHun-chakan na ho

auron ki tarah jalwa-e-didar ke liye

ya-rab mujhe quyud-e-zaman-o-makan na ho

meri zaban-e-haal mera tarjuman bane

KHuddariyon pe minnat-e-nutq-o-bayan na ho

aane ko lab pe shikwa-e-jaur-o-jafa ho jab

us din KHuda kare mere munh mein zaban na ho

waiz rahin-e-kaba barahman hai waqf-e-dair

tum jalwa-gar batao kahan ho kahan na ho

kya shustagi ho us ke mazamin mein 'jalal'

jis ko nasib sohbat-e-ahl-e-zaban na ho