soz-e-mohabbat dard-e-judai tu kya jaane mujhse puchh

soz-e-mohabbat dard-e-judā.ī tū kyā jaane mujh se pūchh

kis ko kahte haiñ tanhā.ī tū kyā jaane mujh se pūchh

patthar aur shīshe se be-shak shīsh-mahal ban saktā hai

ghar kahte haiñ kis ko bhaa.ī tū kyā jaane mujh se pūchh

dil kī lagī se aur to kuchh hāsil na huā is duniyā meñ

muft meñ haath aa.ī rusvā.ī tū kyā jaane mujh se pūchh

ġham se ta.alluq kyā hai merā dard se kaisā rishta hai

duniyā hī jab samajh na paa.ī tū kyā jaane mujh se pūchh

jazboñ ko tahrīk mile to anhonī ho saktī hai

ishq meñ hai kitnī gahrā.ī tū kyā jaane mujh se pūchh

jin kī aañkh meñ phāñs gaḌī hai merī aañkh ke tinke par

karte haiñ añgusht-numā.ī tū kyā jaane mujh se pūchh

mahfil meñ ḳhāmoshī se kyoñ maiñ ne itnā kaam liyā

is meñ bhī thī kuchh dānā.ī tū kyā jaane mujh se pūchh

tark-e-ta.alluq par āmāda karte the hālāt bahut

dil ko kyoñ ye baat na bhaa.ī tū kyā jaane mujh se pūchh

us kā chehra us kī zulfeñ us kī āñkheñ us ke hoñT

is par zālim kī añgḌā.ī tū kyā jaane mujh se pūchh

'shauq' na kuchh jiine kī ḳhushī hai aur na kuchh marne kā malāl

jīvan hai ġham kī shahnā.ī tū kyā jaane mujh se pūchh

soz-e-mohabbat dard-e-judai tu kya jaane mujh se puchh

kis ko kahte hain tanhai tu kya jaane mujh se puchh

patthar aur shishe se be-shak shish-mahal ban sakta hai

ghar kahte hain kis ko bhai tu kya jaane mujh se puchh

dil ki lagi se aur to kuchh hasil na hua is duniya mein

muft mein hath aai ruswai tu kya jaane mujh se puchh

gham se talluq kya hai mera dard se kaisa rishta hai

duniya hi jab samajh na pai tu kya jaane mujh se puchh

jazbon ko tahrik mile to anhoni ho sakti hai

ishq mein hai kitni gahrai tu kya jaane mujh se puchh

jin ki aankh mein phans gaDi hai meri aankh ke tinke par

karte hain angusht-numai tu kya jaane mujh se puchh

mahfil mein KHamoshi se kyon main ne itna kaam liya

is mein bhi thi kuchh danai tu kya jaane mujh se puchh

tark-e-talluq par aamada karte the haalat bahut

dil ko kyon ye baat na bhai tu kya jaane mujh se puchh

us ka chehra us ki zulfen us ki aankhen us ke honT

is par zalim ki angDai tu kya jaane mujh se puchh

'shauq' na kuchh jine ki KHushi hai aur na kuchh marne ka malal

jiwan hai gham ki shahnai tu kya jaane mujh se puchh