سوزش آبلہ پائی نہیں سننے والا

سوزش آبلہ پائی نہیں سننے والا

راستہ کوئی دہائی نہیں سننے والا

ایسی آوازوں کی زد میں ہے سماعت اس کی

وہ صدا کوئی پرائی نہیں سننے والا

بس یہی شے ہے زمانہ میں مجھے سب سے عزیز

میں محبت کی برائی نہیں سننے والا

وصل کو چھوڑ کے ہیں ساری دلیلیں بے کار

ہجر اب کوئی صفائی نہیں سننے والا

گفتگو کیجے مگر سوچ سمجھ کر کیجے

ہر کوئی ہرزہ سرائی نہیں سننے والا

سب کے سب عادی ہوئے ذوق اسیری کے یہاں

کوئی پیغام رہائی نہیں سننے والا

شکوۂ زخم جگر اس سے کیا ہے دلبرؔ

وہ مگر درد جدائی نہیں سننے والا