sozish-e-abla-pai nahin sunne wala

sozish-e-ābla-pā.ī nahīñ sunñe vaalā

rāsta koī duhā.ī nahīñ sunñe vaalā

aisī āvāzoñ kī zad meñ hai samā.at us kī

vo sadā koī parā.ī nahīñ sunñe vaalā

bas yahī shai hai zamāne meñ mujhe sab se aziiz

maiñ mohabbat kī burā.ī nahīñ sunñe vaalā

vasl ko chhoḌ ke haiñ saarī dalīleñ bekār

hijr ab koī safā.ī nahīñ sunñe vaalā

guftugū kiije magar soch-samajh kar kiije

har koī harza-sarā.ī nahīñ sunñe vaalā

sab ke sab aadī hue zauq-e-asīrī ke yahāñ

koī paiġhām-e-rihā.ī nahīñ sunñe vaalā

shikva-e-zaḳhm-e-jigar us se kiyā hai 'dilbar'

vo magar dard-e-judā.ī nahīñ sunñe vaalā

sozish-e-abla-pai nahin sunne wala

rasta koi duhai nahin sunne wala

aisi aawazon ki zad mein hai samaat us ki

wo sada koi parai nahin sunne wala

bas yahi shai hai zamane mein mujhe sab se aziz

main mohabbat ki burai nahin sunne wala

wasl ko chhoD ke hain sari dalilen bekar

hijr ab koi safai nahin sunne wala

guftugu kije magar soch-samajh kar kije

har koi harza-sarai nahin sunne wala

sab ke sab aadi hue zauq-e-asiri ke yahan

koi paigham-e-rihai nahin sunne wala

shikwa-e-zaKHm-e-jigar us se kiya hai 'dilbar'

wo magar dard-e-judai nahin sunne wala