sozish-e-gham ki inayat kabhi aisi to na thi

sozish-e-ġham kī ināyat kabhī aisī to na thī

aaj hai dil kī jo hālat kabhī aisī to na thī

apnī hastī kā bhī ehsās nahīñ hai jaise

ḳhud-farāmoshī-e-vahshat kabhī aisī to na thī

sāzish-e-dīda-o-dil rang hī laa.ī āḳhir

khoī khoī sī tabī.at kabhī aisī to na thī

ai ġham-e-ishq ye terā hī karam hai shāyad

ab hai jo ziist kī sūrat kabhī aisī to na thī

un nigāhoñ ne hī kuchh sehr kiyā hai varna

zindagānī meñ harārat kabhī aisī to na thī

apne hī ḳhūn-e-jigar kā to ye faizān nahīñ

mausam-e-gul meñ tarāvat kabhī aisī to na thī

mauja-e-nūr ne phir sar na uThāyā ho kahīñ

sahmī sahmī huī zulmat kabhī aisī to na thī

aaj kyoñ zad pe haiñ us kī ye mah-o-mehr-o-nujūm

azm-e-insāñ kī jasārat kabhī aisī to na thī

un meñ ehsās-e-ḳhudī jaag rahā hai 'manshā'

varna zarroñ meñ tamāzat kabhī aisī aisī na thī

sozish-e-gham ki inayat kabhi aisi to na thi

aaj hai dil ki jo haalat kabhi aisi to na thi

apni hasti ka bhi ehsas nahin hai jaise

KHud-faramoshi-e-wahshat kabhi aisi to na thi

sazish-e-dida-o-dil rang hi lai aaKHir

khoi khoi si tabiat kabhi aisi to na thi

ai gham-e-ishq ye tera hi karam hai shayad

ab hai jo zist ki surat kabhi aisi to na thi

un nigahon ne hi kuchh sehr kiya hai warna

zindagani mein hararat kabhi aisi to na thi

apne hi KHun-e-jigar ka to ye faizan nahin

mausam-e-gul mein tarawat kabhi aisi to na thi

mauja-e-nur ne phir sar na uThaya ho kahin

sahmi sahmi hui zulmat kabhi aisi to na thi

aaj kyon zad pe hain us ki ye mah-o-mehr-o-nujum

azm-e-insan ki jasarat kabhi aisi to na thi

un mein ehsas-e-KHudi jag raha hai 'mansha'

warna zarron mein tamazat kabhi aisi aisi na thi