subh chale to zauq-e-talab tha arsh-nishan KHurshid-shikar

sub.h chale to zauq-e-talab thā arsh-nishāñ ḳhurshīd-shikār

manzil-e-shām aa.ī to ham haiñ aur shikastoñ ke ambār

dil kī nādānī to dekho kyā kyā armāñ rakhtā hai

jaise davām kā ā.īna ho lamhoñ kī girtī dīvār

ziist sahī ik tiira shabistāñ lekin yaaro shola-e-shauq

ik do nafas to aisā bhaḌkā tūr-misāl thā dil kā dayār

kal tak maiñ aur tū the bāham raqs-e-sabā aur ḳhanda-e-gul

aaj tire lab yās-guzīda merā harf-e-shauq figār

zamzama-o-āhañg kī duniyā kyā yaksar vīrān huī

mahfil mahfil hū kā samāñ hai chehra chehra sañg-e-mazār

yuuñ bhī aage raah kaThin hai aur athāh añdherā hai

ai maazī ke shahr-e-charāġhāñ yuuñ na mujhe pīchhe se pukār

sañg-o-salīb haiñ maidāñ maidāñ aur hujūm-e-jāñ-bāzāñ

kaisī dhuum se aayā ab ke marg-e-tamannā kā tyauhār

subh chale to zauq-e-talab tha arsh-nishan KHurshid-shikar

manzil-e-sham aai to hum hain aur shikaston ke ambar

dil ki nadani to dekho kya kya arman rakhta hai

jaise dawam ka aaina ho lamhon ki girti diwar

zist sahi ek tera shabistan lekin yaro shola-e-shauq

ek do nafas to aisa bhaDka tur-misal tha dil ka dayar

kal tak main aur tu the baham raqs-e-saba aur KHanda-e-gul

aaj tere lab yas-guzida mera harf-e-shauq figar

zamzama-o-ahang ki duniya kya yaksar viran hui

mahfil mahfil hu ka saman hai chehra chehra sang-e-mazar

yun bhi aage rah kaThin hai aur athah andhera hai

ai mazi ke shahr-e-charaghan yun na mujhe pichhe se pukar

sang-o-salib hain maidan maidan aur hujum-e-jaan-bazan

kaisi dhum se aaya ab ke marg-e-tamanna ka tyauhaar