subh-e-daraKHshan apne watan mein KHwab-e-pareshan apne watan mein

sub.h-e-daraḳhshāñ apne vatan meñ ḳhvāb-e-pareshāñ apne vatan meñ

kaif-e-musalsal raqs-e-bahārāñ jalva-e-ḳhandāñ apne vatan meñ

Duub rahī hai nabz-e-hastī TuuT rahā hai saañs kā jaadū

lail-o-nahār-e-zīst yahī hai dard hai darmāñ apne vatan meñ

ahl-e-junūñ ko fāqa-mastī ahl-e-ḳhirad ko ishrat-e-hastī

dekh ke ye tauqīr-e-insāñ aql hai hairāñ apne vatan meñ

aaj havas kā naam mohabbat aur mohabbat vaj.h-e-kulfat

ḳhulq hai mahñgā apne vatan meñ pyaar hai arzāñ apne vatan meñ

dil meñ kasak aur lab par aaheñ aañkh meñ aañsū sar meñ saudā

husn kī duniyā ḳhandāñ ḳhandāñ ishq hai giryāñ apne vatan meñ

bhuul jā 'nāzir' apnā maazī aish-e-guzishta ḳhvāb thā goyā

tere muqaddar meñ hai Thokar tū hai pareshāñ apne vatan meñ

subh-e-daraKHshan apne watan mein KHwab-e-pareshan apne watan mein

kaif-e-musalsal raqs-e-bahaaran jalwa-e-KHandan apne watan mein

Dub rahi hai nabz-e-hasti TuT raha hai sans ka jadu

lail-o-nahaar-e-zist yahi hai dard hai darman apne watan mein

ahl-e-junun ko faqa-masti ahl-e-KHirad ko ishrat-e-hasti

dekh ke ye tauqir-e-insan aql hai hairan apne watan mein

aaj hawas ka nam mohabbat aur mohabbat wajh-e-kulfat

KHulq hai mahnga apne watan mein pyar hai arzan apne watan mein

dil mein kasak aur lab par aahen aankh mein aansu sar mein sauda

husn ki duniya KHandan KHandan ishq hai giryan apne watan mein

bhul ja 'nazir' apna mazi aish-e-guzishta KHwab tha goya

tere muqaddar mein hai Thokar tu hai pareshan apne watan mein