subh-e-firaq al-aman wasl ki sham al-aman

sub.h-e-firāq al-amāñ vasl kī shaam al-amāñ

ajiib hai bisāt-e-ishq ajab nizām al-amāñ

the kabhī jo surḳh-rū vo to ham nahīñ rahe

tum to ho chunīñ-chunāñ tumhārā naam al-amāñ

guzar ga.ī ye zindagī qadam qadam ghasīT ke

maut bhī aa rahī hai kyā gām-ba-gām al-amāñ

phir rahā thā jā-ba-jā faqīr rizq ke liye

āḳhir use ġhizā milī vo bhī harām al-amāñ

saarī talāsh hai abas saarī talab hai rā.egāñ

kār-e-fuzūl ishq meñ sab kuchh tamām al-amāñ

harf-e-kalām se pare harf-e-sukūt kā jahāñ

koī nahīñ pahuñch sakā naqsh-e-davām al-amāñ

khultā nahīñ 'hamesh' par uqda-e-fareb kyuuñ

kis ne bichhā.e haiñ yahāñ dāna-o-dām al-amāñ

subh-e-firaq al-aman wasl ki sham al-aman

ajib hai bisat-e-ishq ajab nizam al-aman

the kabhi jo surKH-ru wo to hum nahin rahe

tum to ho chunin-chunan tumhaara nam al-aman

guzar gai ye zindagi qadam qadam ghasiT ke

maut bhi aa rahi hai kya gam-ba-gam al-aman

phir raha tha ja-ba-ja faqir rizq ke liye

aaKHir use ghiza mili wo bhi haram al-aman

sari talash hai abas sari talab hai raegan

kar-e-fuzul ishq mein sab kuchh tamam al-aman

harf-e-kalam se pare harf-e-sukut ka jahan

koi nahin pahunch saka naqsh-e-dawam al-aman

khulta nahin 'hamesh' par uqda-e-fareb kyun

kis ne bichhae hain yahan dana-o-dam al-aman