subh-e-hasin likhun ki jawan sham kya likhun

sub.h-e-hasīñ likhūñ ki javāñ shaam kyā likhūñ

ai zindagī batā ki tirā naam kyā likhūñ

muddat se sochtā huuñ likhūñ koī ḳhat tujhe

phir ye bhī sochtā huuñ ki paiġhām kyā likhūñ

is dil kī dhaḌkanoñ pe tire naam ke sivā

tū hī batā ki aur koī naam kyā likhūñ

be-nām chāhatoñ kā safar to nazar meñ hai

hairāñ huuñ is talāsh kā anjām kyā likhūñ

tere baġhair kyā hai mirī zindagī kā haal

kaise haiñ mere ghar ke dar-o-bām kyā likhūñ

kuchh to batā 'rafī.a' ki is zindagī ko maiñ

chāhat likhūñ ki chāhat-e-nākām kyā likhūñ

subh-e-hasin likhun ki jawan sham kya likhun

ai zindagi bata ki tera nam kya likhun

muddat se sochta hun likhun koi KHat tujhe

phir ye bhi sochta hun ki paigham kya likhun

is dil ki dhaDkanon pe tere nam ke siwa

tu hi bata ki aur koi nam kya likhun

be-nam chahaton ka safar to nazar mein hai

hairan hun is talash ka anjam kya likhun

tere baghair kya hai meri zindagi ka haal

kaise hain mere ghar ke dar-o-baam kya likhun

kuchh to bata 'rafia' ki is zindagi ko main

chahat likhun ki chahat-e-nakaam kya likhun