subh-e-nau lati hai har sham tumhein kya malum

sub.h-e-nau laatī hai har shaam tumheñ kyā ma.alūm

zaḳhm ḳhushiyoñ ke haiñ paiġhām tumheñ kyā ma.alūm

bhuul kar bhī jo kisī bazm meñ aayā na gayā

saiñkaḌoñ us pe haiñ ilzām tumheñ kyā ma.alūm

log gulshan meñ to chalte haiñ sar-afrāzī se

un meñ kitne haiñ tah-e-dām tumheñ kyā ma.alūm

kuchh añdhere bhī ḳhatāvār-e-tabāhī haiñ magar

raushnī par bhī hai ilzām tumheñ kyā ma.alūm

jis ko tum DhūñDte ho sham-e-ruḳh-e-nāz liye

vo to arse se hai gumnām tumheñ kyā ma.alūm

jo ruḳh-e-zīst pe thā harf-e-ġhalat kī mānind

mil rahā hai use in.aam tumheñ kyā ma.alūm

jo kafan bāñdh ke chalte haiñ vafā kī rah meñ

zindagī kar chuke nīlām tumheñ kyā ma.alūm

surḳh-rū kaun huā kūcha-e-jānāñ meñ kabhī

nāmvar bhī hue badnām tumheñ kyā ma.alūm

do qadam bhī na chale rāh-e-vafā meñ ham log

hai abhī zauq-e-talab ḳhaam tumheñ kyā ma.alūm

jo jalā raat kī tanhā.ī meñ us par bhī 'ḳhayāl'

bevafā.ī kā hai ilzām tumheñ kyā ma.alūm

subh-e-nau lati hai har sham tumhein kya malum

zaKHm KHushiyon ke hain paigham tumhein kya malum

bhul kar bhi jo kisi bazm mein aaya na gaya

sainkaDon us pe hain ilzam tumhein kya malum

log gulshan mein to chalte hain sar-afraazi se

un mein kitne hain tah-e-dam tumhein kya malum

kuchh andhere bhi KHatawar-e-tabahi hain magar

raushni par bhi hai ilzam tumhein kya malum

jis ko tum DhunDte ho sham-e-ruKH-e-naz liye

wo to arse se hai gumnam tumhein kya malum

jo ruKH-e-zist pe tha harf-e-ghalat ki manind

mil raha hai use inam tumhein kya malum

jo kafan bandh ke chalte hain wafa ki rah mein

zindagi kar chuke nilam tumhein kya malum

surKH-ru kaun hua kucha-e-jaanan mein kabhi

namwar bhi hue badnam tumhein kya malum

do qadam bhi na chale rah-e-wafa mein hum log

hai abhi zauq-e-talab KHam tumhein kya malum

jo jala raat ki tanhai mein us par bhi 'KHayal'

bewafai ka hai ilzam tumhein kya malum