subh-e-nau maghrib mein hai bedar bedaron ke sath

sub.h-e-nau maġhrib meñ hai bedār bedāroñ ke saath

aur ham gardish meñ haiñ be-nūr sayyāroñ ke saath

chīḳhtī kirneñ fazā kī dilkashī ko le uḌiiñ

dhuup sāyoñ se lagī hai saa.e dīvāroñ ke saath

dosh par qābīl ke hai laash phir hābīl kī

lamhe qabreñ khodte haiñ apnī minqāroñ ke saath

nār-e-namrūd aur gulzār-e-barāhīm ek hai

phuul bhī lau de rahe haiñ aaj angāroñ ke saath

dekh ai chashm-e-zuleḳhā qadr apne pyaar kī

aaj phir yūsuf ke bhaa.ī haiñ ḳharīdāroñ ke saath

āl-e-mūsā ne kiyā iisā ko phir bālā-e-dār

haiñ havārī bhī yahūdī sang-dil yāroñ ke saath

qibla-e-avval salāhuddīn-ayyūbī ko DhūñD

aa milī dīvār-e-girya terī dīvāroñ ke saath

ai masīhā zahr de lekin na dast-e-ġhair se

ye sitam allāhu-akbar apne bīmāroñ ke saath

is siyāsat kī fazā meñ saañs lenā hai azaab

dushman apne saath haiñ aġhyār haiñ yāroñ ke saath

karbalā meñ yakka-o-tanhā husain-ibn-e-alī

ta.aziye shahroñ meñ haiñ lākhoñ azādāroñ ke saath

dostī kā hashr dekhā to khulā ham par 'zafar'

hashr meñ khul kar kareñge dushmanī pyāroñ ke saath

subh-e-nau maghrib mein hai bedar bedaron ke sath

aur hum gardish mein hain be-nur sayyaron ke sath

chiKHti kirnen faza ki dilkashi ko le uDin

dhup sayon se lagi hai sae diwaron ke sath

dosh par qabil ke hai lash phir habil ki

lamhe qabren khodte hain apni minqaron ke sath

nar-e-namrud aur gulzar-e-barahim ek hai

phul bhi lau de rahe hain aaj angaron ke sath

dekh ai chashm-e-zuleKHa qadr apne pyar ki

aaj phir yusuf ke bhai hain KHaridaron ke sath

aal-e-musa ne kiya isa ko phir baala-e-dar

hain hawari bhi yahudi sang-dil yaron ke sath

qibla-e-awwal salahuddin-ayyubi ko DhunD

aa mili diwar-e-girya teri diwaron ke sath

ai masiha zahr de lekin na dast-e-ghair se

ye sitam allahu-akbar apne bimaron ke sath

is siyasat ki faza mein sans lena hai azab

dushman apne sath hain aghyar hain yaron ke sath

karbala mein yakka-o-tanha husain-ibn-e-ali

taziye shahron mein hain lakhon azadaron ke sath

dosti ka hashr dekha to khula hum par 'zafar'

hashr mein khul kar karenge dushmani pyaron ke sath