subh-e-raushan ko andheron se bhari sham na de
subh-e-raushan ko andheron se bhari sham na de
Ameeta Parsuram Meeta
MORE BYAmeeta Parsuram Meeta
sub.h-e-raushan ko añdheroñ se bharī shaam na de
dil ke rishte ko mirī jaan koī naam na de
moḌ aate hī mujhe chhoḌ ke jaane vaale
phir se tanhā.iyāñ be-chainiyāñ kohrām na de
mujh ko mat bāñdh vafādārī kī zanjīroñ meñ
maiñ ki bādal huuñ bhaTak jaane kā ilzām na de
mutma.in donoñ haiñ maiñ aur merī tarz-e-hayāt
tishnagī mere muāfiq hai koī jaam na de
āsmāñ dene kā ai dost dikhāvā mat kar
mujh ko uḌne kī ijāzat tū tah-e-dām na de
haañ nibhā.e haiñ mohabbat ke farā.ez maiñ ne
mustahiq bhī huuñ magar koī bhī in.aam na de
dil ke afsāne kā āġhāz hasīñ hai 'mītā'
silsila yūñhī chale koī bhī anjām na de
subh-e-raushan ko andheron se bhari sham na de
dil ke rishte ko meri jaan koi nam na de
moD aate hi mujhe chhoD ke jaane wale
phir se tanhaiyan be-chainiyan kohram na de
mujh ko mat bandh wafadari ki zanjiron mein
main ki baadal hun bhaTak jaane ka ilzam na de
mutmain donon hain main aur meri tarz-e-hayat
tishnagi mere muafiq hai koi jam na de
aasman dene ka ai dost dikhawa mat kar
mujh ko uDne ki ijazat tu tah-e-dam na de
han nibhae hain mohabbat ke faraez main ne
mustahiq bhi hun magar koi bhi inam na de
dil ke afsane ka aaghaz hasin hai 'mita'
silsila yunhi chale koi bhi anjam na de
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
