subh kaisi hai wahan sham ki rangat kya hai

sub.h kaisī hai vahāñ shaam kī rañgat kyā hai

ab tire shahr meñ hālāt kī sūrat kyā hai

ek āzār dhaḌaktā hai yahāñ siine meñ

ab tujhe kaise batā.eñ ki mohabbat kyā hai

hukm detā hai to āvāz laraz jaatī hai

jaane ab ke mire sālār kī niyyat kyā hai

ye jo maiñ peḌ ugāne meñ lagā rahtā huuñ

maiñ samajhtā huuñ mirī pahlī zarūrat kyā hai

merā to ye hai ki maiñ bikhrā huā huuñ ab tak

tū batā mujh se bichhaḌ kar tirī hālat kyā hai

aañkh meñ uḌtī huī dhuul batā detī hai

dil meñ aa.e hue bhauñchāl kī shiddat kyā hai

lamha lamha maiñ khiñchā jaatā huuñ us kī jānib

jaane us miTTī se 'az.har' mirī nisbat kyā hai

subh kaisi hai wahan sham ki rangat kya hai

ab tere shahr mein haalat ki surat kya hai

ek aazar dhaDakta hai yahan sine mein

ab tujhe kaise bataen ki mohabbat kya hai

hukm deta hai to aawaz laraz jati hai

jaane ab ke mere salar ki niyyat kya hai

ye jo main peD ugane mein laga rahta hun

main samajhta hun meri pahli zarurat kya hai

mera to ye hai ki main bikhra hua hun ab tak

tu bata mujh se bichhaD kar teri haalat kya hai

aankh mein uDti hui dhul bata deti hai

dil mein aae hue bhaunchaal ki shiddat kya hai

lamha lamha main khincha jata hun us ki jaanib

jaane us miTTi se 'azhar' meri nisbat kya hai