subh ke jalwon mein poshida sawad-e-sham hai

sub.h ke jalvoñ meñ poshīda savād-e-shām hai

ishq ke āġhāz hī meñ ishq kā anjām hai

jaan de kar ham ne paayā hai sukūn-e-mustaqil

ab vo manzil hai jahāñ ārām hī ārām hai

ġham meñ ḳhush huuñ aur rone kī jagah hañstā huuñ maiñ

ai dil-e-majbūr majbūrī isī kā naam hai

yād-e-jānāñ kī jagah dil meñ hai fikr-e-rozgār

gardish-e-taqdīr bhī ab gardish-e-ayyām hai

tum ko kyā ma.alūm jis ko maut kahtā hai jahāñ

ishq kā āġhāz hai yā ishq kā anjām hai

ḳhaas jalve ḳhaas nazroñ ke liye maḳhsūs haiñ

sirf kahne ke liye izn-e-nazāra aam hai

raunaq-e-mai-ḳhāna 'raunaq' aur ye hāl-e-tabāh

sar pe ḳhāk-e-mai-kada hāthoñ meñ ḳhālī jaam hai

subh ke jalwon mein poshida sawad-e-sham hai

ishq ke aaghaz hi mein ishq ka anjam hai

jaan de kar hum ne paya hai sukun-e-mustaqil

ab wo manzil hai jahan aaram hi aaram hai

gham mein KHush hun aur rone ki jagah hansta hun main

ai dil-e-majbur majburi isi ka nam hai

yaad-e-jaanan ki jagah dil mein hai fikr-e-rozgar

gardish-e-taqdir bhi ab gardish-e-ayyam hai

tum ko kya malum jis ko maut kahta hai jahan

ishq ka aaghaz hai ya ishq ka anjam hai

KHas jalwe KHas nazron ke liye maKHsus hain

sirf kahne ke liye izn-e-nazara aam hai

raunaq-e-mai-KHana 'raunaq' aur ye haal-e-tabah

sar pe KHak-e-mai-kada hathon mein KHali jam hai