subh ke ujle jaziron pe bhi tari hui sham

sub.h ke ujle jazīroñ pe bhī taarī huī shaam

sahme sahme haiñ manāzir ki shikārī huī shaam

har taraf raushnī-o-rang kā raqs-e-paiham

yaad aatī hai tire saath guzārī huī shaam

jam ga.iiñ gahrī udāsī kī taheñ palkoñ par

oḌh ke terā ḳhayāl aur bhī bhārī huī shaam

kho ga.e jaane kahāñ sard havāoñ ke sitār

mastī-o-kaif ke ehsās se aarī huī shaam

umr bhar dhuup kī poshish rahī ḳhuddārī par

ham ne pahnī na harīfoñ kī utārī huī shaam

āḳhirash Duub ga.ī apne hī sannāToñ meñ

merī pur-shor tamannāoñ se haarī huī shaam

dosto ham ko tumhārī sabhī sharteñ manzūr

tum agar sub.h ke tālib ho hamārī huī shaam

'mīr'-o-'ġhālib' hue 'hasrat' hue yā 'faiz'-o-'firāq'

sab ġhazal vāloñ pe sau jaan se vaarī huī shaam

ek ham hī ba-sar-o-chashm fidā the is par

'jauhar' ab jaa.e kahāñ hijr kī maarī huī shaam

subh ke ujle jaziron pe bhi tari hui sham

sahme sahme hain manazir ki shikari hui sham

har taraf raushni-o-rang ka raqs-e-paiham

yaad aati hai tere sath guzari hui sham

jam gain gahri udasi ki tahen palkon par

oDh ke tera KHayal aur bhi bhaari hui sham

kho gae jaane kahan sard hawaon ke sitar

masti-o-kaif ke ehsas se aari hui sham

umr bhar dhup ki poshish rahi KHuddari par

hum ne pahni na harifon ki utari hui sham

aaKHirash Dub gai apne hi sannaTon mein

meri pur-shor tamannaon se haari hui sham

dosto hum ko tumhaari sabhi sharten manzur

tum agar subh ke talib ho hamari hui sham

'mir'-o-'ghaalib' hue 'hasrat' hue ya 'faiz'-o-'firaq'

sab ghazal walon pe sau jaan se wari hui sham

ek hum hi ba-sar-o-chashm fida the is par

'jauhar' ab jae kahan hijr ki mari hui sham