subh KHud bataegi tirgi kahan jae

sub.h ḳhud batā.egī tīrgī kahāñ jaa.e

ye charāġh kī jhūTī raushnī kahāñ jaa.e

jo nasheb aa.egā rāsta dikhā.egā

moḌ ḳhud batā.egā aadmī kahāñ jaa.e

baḌh ke do qadam tū hī us kī piiTh halkī kar

ye thakā musāfir ai rahzanī kahāñ jaa.e

hā-o-hū kī duniyā meñ mā-o-tū kī duniyā meñ

rañg o bū kī duniyā meñ sādgī kahāñ jaa.e

be-ta.alluqī maslak ho chukā hai duniyā kā

dostī kahāñ jaa.e dushmanī kahāñ jaa.e

ab to dhuup aa pahuñchī jhāḌiyoñ ke andar bhī

ab panāh lene ko tīrgī kahāñ jaa.e

kārvāñ ne chūlhoñ meñ jhoñk dī ghanī shāḳheñ

ab kahīñ nahīñ saaya ḳhastagī kahāñ jaa.e

zaḳhm-e-dil to kyā doge dāġh-e-sajda hī de do

ab tumhārī chaukhaT se 'maz.harī' kahāñ jaa.e

subh KHud bataegi tirgi kahan jae

ye charagh ki jhuTi raushni kahan jae

jo nasheb aaega rasta dikhaega

moD KHud bataega aadmi kahan jae

baDh ke do qadam tu hi us ki piTh halki kar

ye thaka musafir ai rahzani kahan jae

ha-o-hu ki duniya mein ma-o-tu ki duniya mein

rang o bu ki duniya mein sadgi kahan jae

be-talluqi maslak ho chuka hai duniya ka

dosti kahan jae dushmani kahan jae

ab to dhup aa pahunchi jhaDiyon ke andar bhi

ab panah lene ko tirgi kahan jae

karwan ne chulhon mein jhonk di ghani shaKHen

ab kahin nahin saya KHastagi kahan jae

zaKHm-e-dil to kya doge dagh-e-sajda hi de do

ab tumhaari chaukhaT se 'mazhari' kahan jae