صبح کی دھوپ یہ معصوم فضا رہنے دے

صبح کی دھوپ یہ معصوم فضا رہنے دے

اور کچھ دیر لب گل پہ دعا رہنے دے

ایسے موسم میں کوئی پھول کہاں کھلتا ہے

میں اگر کھل بھی گیا ہوں تو کھلا رہنے دے

فصل نو ہم تجھے پرکھیں گے مگر شرط یہ ہے

پچھلے موسم کا بھی اک زخم ہرا رہنے دے

بند کمرے کے دریچے کا تقاضا بھی سمجھ

سانس لینے کے لیے کچھ تو ہوا رہنے دے

آج آنکھوں میں کوئی رات گئے آئے گا

آج کی رات یہ دروازہ کھلا رہنے دے

رات کا وقت ہے اور راہ بھی سونی ہے شکیلؔ

دل کی دہلیز پہ اک دیپ جلا رہنے دے