subh ki pahli kiran pahli nazar se pahle

sub.h kī pahlī kiran pahlī nazar se pahle

ham ko honā hai kahīñ aur sahar se pahle

chāñd ne dekh liyā ham ko kanār-e-dariyā

bhaag chalte haiñ kisī aur ḳhabar se pahle

lau lagāne se ga.ī dar-badarī kī zillat

ḳhud ko pahuñchā huā lagtā huuñ safar se pahle

kyuuñ na duniyā ko dikhā.ūñ maiñ jale haath kā zaḳhm

kuchh charāġhoñ se ta.alluq thā udhar se pahle

ik hathelī hai mirī ek hathelī us kī

sab duā.eñ haiñ asar-yāb asar se pahle

shaam ke ba.ad añdherā nahīñ rahtā ghar meñ

ek sūraj nikal aatā hai sahar se pahle

tab mirī aañkh khulā kartī thī andar kī taraf

maiñ ne dekhā hai use pahlī nazar se pahle

tū faqat sīna-o-dil hai na faqat āriz-o-lab

suḳhan āġhāz kare koī kidhar se pahle

subh ki pahli kiran pahli nazar se pahle

hum ko hona hai kahin aur sahar se pahle

chand ne dekh liya hum ko kanar-e-dariya

bhag chalte hain kisi aur KHabar se pahle

lau lagane se gai dar-badari ki zillat

KHud ko pahuncha hua lagta hun safar se pahle

kyun na duniya ko dikhaun main jale hath ka zaKHm

kuchh charaghon se talluq tha udhar se pahle

ek hatheli hai meri ek hatheli us ki

sab duaen hain asar-yab asar se pahle

sham ke baad andhera nahin rahta ghar mein

ek suraj nikal aata hai sahar se pahle

tab meri aankh khula karti thi andar ki taraf

main ne dekha hai use pahli nazar se pahle

tu faqat sina-o-dil hai na faqat aariz-o-lab

suKHan aaghaz kare koi kidhar se pahle