صبح تو دیکھا تھا وقت شام آ کر دیکھیے

صبح تو دیکھا تھا وقت شام آ کر دیکھیے

اپنے دیوانے کا اب انجام آ کر دیکھیے

کچھ نہیں معلوم ہے کس وقت یہ دم توڑ دے

حالت بیمار صبح و شام آ کر دیکھیے

لب پہ آہیں دل میں دھڑکن ٹمٹماتا اک چراغ

کس قدر رنگیں ہے میری شام آ کر دیکھیے

ناز سے وہ کہہ رہے ہیں رخ پہ زلفیں ڈال کر

صبح پہ چھائی ہوئی ہے شام آ کر دیکھیے

آپ کی فرقت میں کھاتا ہے جہاں کی ٹھوکریں

بیکسیٔ عاشق ناکام آ کر دیکھیے

دم بہ دم یہ بہہ رہا ہے کس کی آنکھوں سے لہو

کون ہے یہ لرزہ بر اندام آ کر دیکھیے

جھلملاتے ہیں ہزاروں آرزوؤں کے چراغ

جعفریؔ کی قبر وقت شام آ کر دیکھیے