subh to dekha tha waqt-e-sham aa kar dekhiye

sub.h to dekhā thā vaqt-e-shām aa kar dekhiye

apne dīvāne kā ab anjām aa kar dekhiye

kuchh nahīñ ma.alūm hai kis vaqt ye dam toḌ de

hālat-e-bīmār sub.h-o-shām aa kar dekhiye

lab pe aaheñ dil meñ dhaḌkan TimTimātā ik charāġh

kis qadar rangīñ hai merī shaam aa kar dekhiye

naaz se vo kah rahe haiñ ruḳh pe zulfeñ Daal kar

sub.h pe chhā.ī huī hai shaam aa kar dekhiye

aap kī furqat meñ khātā hai jahāñ kī Thokareñ

bekasī-e-āshiq-e-nākām aa kar dekhiye

dam-ba-dam ye bah rahā hai kis kī āñkhoñ se lahū

kaun hai ye larza-bar-andām aa kar dekhiye

jhilmilāte haiñ hazāroñ ārzūoñ ke charāġh

'ja.afarī' kī qabr vaqt-e-shām aa kar dekhiye

subh to dekha tha waqt-e-sham aa kar dekhiye

apne diwane ka ab anjam aa kar dekhiye

kuchh nahin malum hai kis waqt ye dam toD de

haalat-e-bimar subh-o-sham aa kar dekhiye

lab pe aahen dil mein dhaDkan TimTimata ek charagh

kis qadar rangin hai meri sham aa kar dekhiye

naz se wo kah rahe hain ruKH pe zulfen Dal kar

subh pe chhai hui hai sham aa kar dekhiye

aap ki furqat mein khata hai jahan ki Thokaren

bekasi-e-ashiq-e-nakaam aa kar dekhiye

dam-ba-dam ye bah raha hai kis ki aankhon se lahu

kaun hai ye larza-bar-andam aa kar dekhiye

jhilmilate hain hazaron aarzuon ke charagh

'jafari' ki qabr waqt-e-sham aa kar dekhiye