subha se matlab na kuchh zunnar se

sub.ha se matlab na kuchh zunnār se

haiñ judā ham kāfir o dīñ-dār se

ishq hai us abrū-e-ḳhamdār se

kāTūñgā ik din galā talvār se

dil mirā aTkā hai chashm-e-yār se

hai mohabbat mardum-e-bīmār se

yuuñ evaz luuñ jī meñ hai aġhyār se

ghar jalā duuñ āh-e-ātish-bār se

haiñ ayaañ kuchh ishq ke āsār se

sho'le uThte haiñ dil-afgār se

kyuuñ na dil apnā nazār-o-zār ho

kuchh nazar aate ho tum bezār se

rashk se dil meñ na kyuuñ jal jaa.e sham'

lau nikaltī hai tire ruḳhsār se

hijr meñ ho kyuuñ na lazzat vasl kī

hai mazā inkār meñ iqrār se

kūcha-e-kākul meñ kho kar naqd-e-dil

mol saudā laa.e ham bāzār se

jhāñke rauzan se jo tujh ko raḳhna-gar

phoḌ Dālūñ sar ko maiñ dīvār se

jaan aafat meñ paḌī hai ai tabīb

maut behtar hijr ke āzār se

har qadam par shor-e-mahshar hai bapā

piste haiñ dil aap kī raftār se

ḳhizr lā kar deñ agar āb-e-baqā

maiñ na badlūñ sharbat-e-dīdār se

teġh-e-abrū kā jo bosa de to de

varna zālim qatl kar talvār se

ḳhil.at-e-uryānī aur jāgīr-e-dasht

ham ne paayā ishq kī sarkār se

sarv ke chehra kamar siina kahāñ

is ko kyā tashbīh qadd-e-yār se

hijr meñ jañgal se hai gulshan sivā

gul bhī mujh ko kam nahīñ haiñ ḳhaar se

jā-e-āsā.ish nahīñ hai dūsrī

baḌh ke tere sāya-e-dīvār se

roz tanhā.ī meñ rahtī hai yahāñ

guftugū pahroñ ḳhayāl-e-yār se

zulf-o-āriz chashm-o-abrū ḳhāl-o-ḳhat

dil nahīñ bachtā inhīñ do-chār se

bosa ab qand-e-mukarrar ho gayā

duunī lazzat ho ga.ī takrār se

shart meñ bosoñ kī bhī kyā lutf hai

jiit meñ kam-tar mazā hai haar se

ek gul-rū par huā dil daaġh daaġh

phuul laa.e aaj ham gulzār se

koī mai-kash phir na baiThā ek dam

maiñ jo uThThā ḳhāna-e-ḳhummār se

bulbuleñ us rashk-e-gul ke hijr meñ

nochtī haiñ apne par minqār se

'sehr' bhejeñge ġhazal ye yaar ko

shauq hai us ko mire ash'ār se

subha se matlab na kuchh zunnar se

hain juda hum kafir o din-dar se

ishq hai us abru-e-KHamdar se

kaTunga ek din gala talwar se

dil mera aTka hai chashm-e-yar se

hai mohabbat mardum-e-bimar se

yun ewaz lun ji mein hai aghyar se

ghar jala dun aah-e-atish-bar se

hain ayan kuchh ishq ke aasar se

sho'le uThte hain dil-afgar se

kyun na dil apna nazar-o-zar ho

kuchh nazar aate ho tum bezar se

rashk se dil mein na kyun jal jae sham'

lau nikalti hai tere ruKHsar se

hijr mein ho kyun na lazzat wasl ki

hai maza inkar mein iqrar se

kucha-e-kakul mein kho kar naqd-e-dil

mol sauda lae hum bazar se

jhanke rauzan se jo tujh ko raKHna-gar

phoD Dalun sar ko main diwar se

jaan aafat mein paDi hai ai tabib

maut behtar hijr ke aazar se

har qadam par shor-e-mahshar hai bapa

piste hain dil aap ki raftar se

KHizr la kar den agar aab-e-baqa

main na badlun sharbat-e-didar se

tegh-e-abru ka jo bosa de to de

warna zalim qatl kar talwar se

KHilat-e-uryani aur jagir-e-dasht

hum ne paya ishq ki sarkar se

sarw ke chehra kamar sina kahan

is ko kya tashbih qadd-e-yar se

hijr mein jangal se hai gulshan siwa

gul bhi mujh ko kam nahin hain KHar se

ja-e-asaish nahin hai dusri

baDh ke tere saya-e-diwar se

roz tanhai mein rahti hai yahan

guftugu pahron KHayal-e-yar se

zulf-o-ariz chashm-o-abru KHal-o-KHat

dil nahin bachta inhin do-chaar se

bosa ab qand-e-mukarrar ho gaya

duni lazzat ho gai takrar se

shart mein boson ki bhi kya lutf hai

jit mein kam-tar maza hai haar se

ek gul-ru par hua dil dagh dagh

phul lae aaj hum gulzar se

koi mai-kash phir na baiTha ek dam

main jo uThTha KHana-e-KHummar se

bulbulen us rashk-e-gul ke hijr mein

nochti hain apne par minqar se

'sehr' bhejenge ghazal ye yar ko

shauq hai us ko mere ash'ar se