subuk mujhko mohabbat mein ye kaj-uftad karta hai

subuk mujh ko mohabbat meñ ye kaj-uftād kartā hai

jo maiñ hargiz na kartā vo mirā ham-zād kartā hai

bikhar kar bhī usī ko DhūñDhtī haiñ har taraf āñkheñ

jo mujh ko ik nigah meñ ik se lā-ta.adād kartā hai

huī haiñ shor-e-dil meñ ġharq ta.abīreñ sadāoñ kī

magar itnī ḳhabar hai koī kuchh irshād kartā hai

qayāmat hai jo ab ye ḳhuftagān-e-ḳhāk-e-dil jāgeñ

koī is kohna vīrāne ko phir ābād kartā hai

kahā ho kuchh kabhī mujh se to ai chāragaro jānūñ

maiñ kyā kah duuñ dil-e-bīmār kis ko yaad kartā hai

sarāmad ishq hai paatā hai koī dil nasīboñ se

phir apne vāste ma.ashūq ḳhud ījād kartā hai

burā kahnā mujhe us kā vazīfa hai to hone do

vo ḳhud ko yuuñ mire aaseb se āzād kartā hai

subuk mujh ko mohabbat mein ye kaj-uftad karta hai

jo main hargiz na karta wo mera ham-zad karta hai

bikhar kar bhi usi ko DhunDhti hain har taraf aankhen

jo mujh ko ek nigah mein ek se la-tadad karta hai

hui hain shor-e-dil mein gharq tabiren sadaon ki

magar itni KHabar hai koi kuchh irshad karta hai

qayamat hai jo ab ye KHuftagan-e-KHak-e-dil jagen

koi is kohna virane ko phir aabaad karta hai

kaha ho kuchh kabhi mujh se to ai chaaragaro jaanun

main kya kah dun dil-e-bimar kis ko yaad karta hai

saramad ishq hai pata hai koi dil nasibon se

phir apne waste mashuq KHud ijad karta hai

bura kahna mujhe us ka wazifa hai to hone do

wo KHud ko yun mere aaseb se aazad karta hai