subu ko jam ko KHam ko sharab-KHane ko

subū ko jaam ko ḳham ko sharāb-ḳhāne ko

nigāh-e-mast ne Thukrā diyā zamāne ko

haqīqatoñ meñ jagah mil ga.ī fasāne ko

duā.eñ dījiye badle hue zamāne ko

badal ga.e jo kisī kī nigāh ke tevar

badal badal ke sunānā paḌā fasāne ko

jahāñ meñ kaun hai apnā kise sunā.ūñ maiñ

sunegā kaun mire dukh-bhare fasāne ko

ye hādsāt ye barbādiyāñ ye ḳhūñ-rezī

zamāna yaad karegā tire zamāne ko

jo hañs rahe haiñ musalsal mirī tabāhī par

taras na jaa.eñ kahīñ vo bhī muskurāne ko

ik aisā daur bhī aaya chaman meñ ai 'raunaq'

ḳhushī se ham ne jalāyā hai āshiyāne ko

subu ko jam ko KHam ko sharab-KHane ko

nigah-e-mast ne Thukra diya zamane ko

haqiqaton mein jagah mil gai fasane ko

duaen dijiye badle hue zamane ko

badal gae jo kisi ki nigah ke tewar

badal badal ke sunana paDa fasane ko

jahan mein kaun hai apna kise sunaun main

sunega kaun mere dukh-bhare fasane ko

ye hadsat ye barbaadiyan ye KHun-rezi

zamana yaad karega tere zamane ko

jo hans rahe hain musalsal meri tabahi par

taras na jaen kahin wo bhi muskurane ko

ek aisa daur bhi aaya chaman mein ai 'raunaq'

KHushi se hum ne jalaya hai aashiyane ko