subut-e-jurm na milne ka phir bahana kiya

subūt-e-jurm na milne kā phir bahāna kiyā

ki adliya ne vahī faisla purānā kiyā

havā ke apne masā.il haiñ aur charāġh ke bhī

na vo ġhalat na amal us ne mujrimāna kiyā

ye tum ne jañg kā unvān hī badal Daalā

alam sajāyā na lashkar koī ravāna kiyā

harī bharī thiiñ jo shāḳheñ vahī phalīñ phūlīñ

usī shajar ko parindoñ ne āshiyāna kiyā

savāl maiñ ne bhī rakkhe guzārishoñ kī tarah

badal ke us ne bhī andāz-e-dil-barāna kiyā

mire liye hī adāvat ke dar bhī khole ga.e

mire hī naam mohabbat kā bhī ḳhazāna kiyā

hamesha va.ade hue taaj ke havāle se

agarche taḳht ne va.ada kabhī vafā na kiyā

subut-e-jurm na milne ka phir bahana kiya

ki adliya ne wahi faisla purana kiya

hawa ke apne masail hain aur charagh ke bhi

na wo ghalat na amal us ne mujrimana kiya

ye tum ne jang ka unwan hi badal Dala

alam sajaya na lashkar koi rawana kiya

hari bhari thin jo shaKHen wahi phalin phulin

usi shajar ko parindon ne aashiyana kiya

sawal main ne bhi rakkhe guzarishon ki tarah

badal ke us ne bhi andaz-e-dil-barana kiya

mere liye hi adawat ke dar bhi khole gae

mere hi nam mohabbat ka bhi KHazana kiya

hamesha wade hue taj ke hawale se

agarche taKHt ne wada kabhi wafa na kiya