suhane KHwab aankhon mein sanjona chahta hun

suhāne ḳhvāb āñkhoñ meñ sañjonā chāhtā huuñ

meñ ab ārām se kuchh der sonā chāhtā huuñ

shajar ko bār-āvar dekhnā maqsad nahīñ hai

ki meñ to bas zamīñ par ḳhvāb bonā chāhtā huuñ

mire hañste hue bachcho ye saarā ghar tumhārā

maiñ rone ke liye bas ek konā chāhtā huuñ

navāh-e-zīst meñ kyuuñ bārisheñ hotī nahīñ haiñ

maiñ pichhle mausamoñ ke zaḳhm dhonā chāhtā huuñ

bas us ke aane tak mausam mujhe sarsabz rakhnā

use ik ḳhaar ab maiñ bhī chubhonā chāhtā huuñ

mujhe be-ḳhvāb rakhtī hai kabhī duniyā kabhī dil

maiñ bachchoñ kī tarah be-fikr sonā chāhtā huuñ

havāo kyā tumhārā mehrbāñ shāna milegā

dahāḌeñ maar kar maiñ aaj ronā chāhtā huuñ

jise hai jaañ aziiz apnī utar jaa.e kināre

maiñ apnī naav maujoñ meñ Dubonā chāhtā huuñ

'salīm' ab āñdhiyoñ se ham-rakābī kis liye hai

sar-e-mizhgāñ bachā kyā hai ki khonā chāhtā huuñ

suhane KHwab aankhon mein sanjona chahta hun

mein ab aaram se kuchh der sona chahta hun

shajar ko bar-awar dekhna maqsad nahin hai

ki mein to bas zamin par KHwab bona chahta hun

mere hanste hue bachcho ye sara ghar tumhaara

main rone ke liye bas ek kona chahta hun

nawah-e-zist mein kyun barishen hoti nahin hain

main pichhle mausamon ke zaKHm dhona chahta hun

bas us ke aane tak mausam mujhe sarsabz rakhna

use ek KHar ab main bhi chubhona chahta hun

mujhe be-KHwab rakhti hai kabhi duniya kabhi dil

main bachchon ki tarah be-fikr sona chahta hun

hawao kya tumhaara mehrban shana milega

dahaDen mar kar main aaj rona chahta hun

jise hai jaan aziz apni utar jae kinare

main apni naw maujon mein Dubona chahta hun

'salim' ab aandhiyon se ham-rakabi kis liye hai

sar-e-mizhgan bacha kya hai ki khona chahta hun