suhulat-e-gham-e-hijran ko kam kiya jae

suhūlat-e-ġham-e-hijrāñ ko kam kiyā jaa.e

ghuTan meñ taaza udāsī ko zam kiyā jaa.e

kitāb meñ to ka.ī phuul tum ne rakkhe haiñ

mirī jabīñ pe bhī bosā raqam kiyā jaa.e

maiñ puure din kī thakan ghar meñ le ke aayā huuñ

udāsiyo mujhe phir tāza-dam kiyā jaa.e

ka.ī gulāb ugāne haiñ is jagah mujh ko

badan kī ḳhushk zamīnoñ ko nam kiyā jaa.e

daraḳht TūTte pattoñ kā dukh samajhte haiñ

unheñ bhī shāmil-e-yārān-e-ġham kiyā jaa.e

tabīb ne mire nusḳhe meñ ye likhā 'sarmad'

marīz-e-ishq hai ġhazloñ kā dam kiyā jaa.e

suhulat-e-gham-e-hijran ko kam kiya jae

ghuTan mein taza udasi ko zam kiya jae

kitab mein to kai phul tum ne rakkhe hain

meri jabin pe bhi bosa raqam kiya jae

main pure din ki thakan ghar mein le ke aaya hun

udasiyo mujhe phir taza-dam kiya jae

kai gulab ugane hain is jagah mujh ko

badan ki KHushk zaminon ko nam kiya jae

daraKHt TuTte patton ka dukh samajhte hain

unhen bhi shamil-e-yaran-e-gham kiya jae

tabib ne mere nusKHe mein ye likha 'sarmad'

mariz-e-ishq hai ghazlon ka dam kiya jae