suKHan ke shauq mein tauhin harf ki nahin ki

suḳhan ke shauq meñ tauhīn harf kī nahīñ kī

ki ham ne daad kī ḳhvāhish meñ shā.erī nahīñ kī

jo ḳhud-pasand the un se suḳhan kiyā kam kam

jo kaj-kulāh the un se to baat bhī nahīñ kī

kabhī bhī ham ne na kī koī baat maslahatan

munāfiqat kī himāyat, nahīñ, kabhī nahīñ kī

dikhā.ī detā kahāñ phir alag se apnā vajūd

so ham ne zaat kī tafhīm āḳhirī nahīñ kī

use batāyā nahīñ hai ki maiñ badan meñ nahīñ

jo baat sab se zarūrī hai vo abhī nahīñ kī

ba-nām-e-ḳhush-nafasī ham to aah bharte rahe

ki sirf rañj kiyā ham ne, zindagī nahīñ kī

hamesha dil ko mayassar rahī hai daulat-e-hijr

junūñ ke rizq meñ us ne kabhī kamī nahīñ kī

ba-sad ḳhulūs uThātā rahā sabhī ke ye naaz

hamāre dil ne hamārī hī dilbarī nahīñ kī

jise vatīra banā.e rahī vo chashm-e-ġhazāl

vo be-ruḳhī kī suhulat hameñ bhī thii, nahīñ kī

hai ek umr se ma.amūl roz kā 'irfān'

duā-e-radd-e-anā ham ne aaj hī nahīñ kī

suKHan ke shauq mein tauhin harf ki nahin ki

ki hum ne dad ki KHwahish mein shaeri nahin ki

jo KHud-pasand the un se suKHan kiya kam kam

jo kaj-kulah the un se to baat bhi nahin ki

kabhi bhi hum ne na ki koi baat maslahatan

munafiqat ki himayat, nahin, kabhi nahin ki

dikhai deta kahan phir alag se apna wajud

so hum ne zat ki tafhim aaKHiri nahin ki

use bataya nahin hai ki main badan mein nahin

jo baat sab se zaruri hai wo abhi nahin ki

ba-nam-e-KHush-nafasi hum to aah bharte rahe

ki sirf ranj kiya hum ne, zindagi nahin ki

hamesha dil ko mayassar rahi hai daulat-e-hijr

junun ke rizq mein us ne kabhi kami nahin ki

ba-sad KHulus uThata raha sabhi ke ye naz

hamare dil ne hamari hi dilbari nahin ki

jise watira banae rahi wo chashm-e-ghazal

wo be-ruKHi ki suhulat hamein bhi thi, nahin ki

hai ek umr se mamul roz ka 'irfan'

dua-e-radd-e-ana hum ne aaj hi nahin ki