suKHan ke shauqin to suna hai sanam bhi hain na

suḳhan ke shauqīn to sunā hai sanam bhī haiñ nā

so is ta'alluq se un ko ham mohtaram bhī haiñ nā

mirī ġhazal meñ lahū kī ḳhushbū pe kyoñ hai hairat

mirī ġhazal meñ tumhāre shāmil karam bhī haiñ nā

ġhazal meñ matla' kaho to har-chand dekh lenā

ki misra’oñ ke qavāfī aapas meñ zam bhī haiñ nā

ḳhatā pe tum zāhiran mu'āfī to chāhte ho

tumhāre siine kī āñkheñ ai dost nam bhī haiñ nā

tū saat janmoñ ke mujh se vā'de kā kah rahā hai

tujhī pe qurbāñ agar hazāroñ janam bhī haiñ nā

tujhe mubārak kahūñ to kaise kahūñ moharram

ki tere andar vo kuchh kabīra se ġham bhī haiñ nā

safed shāḳhoñ ke peḌ dekhe to chhaT se 'tāhir'

ka.ī parinde pukār uTThe ki ham bhī haiñ nā

suKHan ke shauqin to suna hai sanam bhi hain na

so is ta'alluq se un ko hum mohtaram bhi hain na

meri ghazal mein lahu ki KHushbu pe kyon hai hairat

meri ghazal mein tumhaare shamil karam bhi hain na

ghazal mein matla' kaho to har-chand dekh lena

ki misra’on ke qawafi aapas mein zam bhi hain na

KHata pe tum zahiran mu'afi to chahte ho

tumhaare sine ki aankhen ai dost nam bhi hain na

tu sat janmon ke mujh se wa'de ka kah raha hai

tujhi pe qurban agar hazaron janam bhi hain na

tujhe mubarak kahun to kaise kahun moharram

ki tere andar wo kuchh kabira se gham bhi hain na

safed shaKHon ke peD dekhe to chhaT se 'tahir'

kai parinde pukar uTThe ki hum bhi hain na