سخن سخن میں وہ رمز آشنا دکھائی دی

سخن سخن میں وہ رمز آشنا دکھائی دی

زنان شہر میں سب سے جدا دکھائی دی

گزار آئے وہ ہر لمحہ شب پرستی میں

سحر کی روشنی مجھ سے خفا دکھائی دی

میں اس سے دل کی کوئی بات بھی چھپا نہ سکا

وہ اجنبی تھی مگر آشنا دکھائی دی

مرے گماں میں نہ تھا جسم و جاں بھی وارے گی

جہاں کہیں ملی بے اعتنا دکھائی دی

کسے خبر تھی وہ آسیب گاہ نکلے گی

غبار ماہ میں دور اک سرا دکھائی دی

مزاج پرسی کجا آنکھ بھی ملا نہ سکا

اکیلی سڑکوں پہ وہ بارہا دکھائی دی