suKHan suKHan mein wo ramz-ashna dikhai di

suḳhan suḳhan meñ vo ramz-āshnā dikhā.ī dī

zanān-e-shahr meñ sab se judā dikhā.ī dī

guzār aa.e vo har lamha shab-parastī meñ

sahar kī raushnī mujh se ḳhafā dikhā.ī dī

maiñ us se dil kī koī baat bhī chhupā na sakā

vo ajnabī thī magar āshnā dikhā.ī dī

mire gumāñ meñ na thā jism-o-jāñ bhī vāregī

jahāñ kahīñ milī be-e'tinā dikhā.ī dī

kise ḳhabar thī vo āseb-gāh niklegī

ġhubār-e-māh meñ duur ik sarā dikhā.ī dī

mizāj-pursī kujā aañkh bhī milā na sakā

akelī saḌkoñ pe vo bārhā dikhā.ī dī

suKHan suKHan mein wo ramz-ashna dikhai di

zanan-e-shahr mein sab se juda dikhai di

guzar aae wo har lamha shab-parasti mein

sahar ki raushni mujh se KHafa dikhai di

main us se dil ki koi baat bhi chhupa na saka

wo ajnabi thi magar aashna dikhai di

mere guman mein na tha jism-o-jaan bhi waregi

jahan kahin mili be-e'tina dikhai di

kise KHabar thi wo aaseb-gah niklegi

ghubar-e-mah mein dur ek sara dikhai di

mizaj-pursi kuja aankh bhi mila na saka

akeli saDkon pe wo barha dikhai di