suKHanwaron ki tarah ishtiyaq-e-did ke baad

suḳhanvaroñ kī tarah ishtiyāq-e-dīd ke baa'd

falak pe chāñd khañgālegā kaun 'iid ke baa'd

tamām shahr thā qatl-e-husain meñ shāmil

maiñ kitne naam ginā.ūñ tumheñ yazīd ke baa'd

saḌe gale hue miTTī ke ek putle ko

'atā hayāt huī bhī hai to va’ī.d ke baa'd

chaḌhā rahā hai vahī phuul qabr par merī

vatan ko bech diyā jis ne mujh shahīd ke baa'd

janāb-e-'mīr' kī mīrās haiñ mirī ġhazleñ

jadīd kyoñ maiñ banā.ūñ inheñ jadīd ke baa'd

tumheñ hī bāra-darī se guzar ke aanā thā

tumhīñ nikāloge gunjā.isheñ mazīd ke baa'd

sanā-e-husn na kartīñ to aur kyā kartīñ

mirī nigāheñ tirī be-hijāb diid ke baa'd

rakhe haiñ zaḳhm namak-dān-e-yād-e-māzī par

hamārā dard 'ayāñ kyoñ na ho shadīd ke baa'd

suKHanwaron ki tarah ishtiyaq-e-did ke ba'd

falak pe chand khangalega kaun 'id ke ba'd

tamam shahr tha qatl-e-husain mein shamil

main kitne nam ginaun tumhein yazid ke ba'd

saDe gale hue miTTi ke ek putle ko

'ata hayat hui bhi hai to wa’id ke ba'd

chaDha raha hai wahi phul qabr par meri

watan ko bech diya jis ne mujh shahid ke ba'd

janab-e-'mir' ki miras hain meri ghazlen

jadid kyon main banaun inhen jadid ke ba'd

tumhein hi bara-dari se guzar ke aana tha

tumhin nikaloge gunjaishen mazid ke ba'd

sana-e-husn na kartin to aur kya kartin

meri nigahen teri be-hijab did ke ba'd

rakhe hain zaKHm namak-dan-e-yaad-e-mazi par

hamara dard 'ayan kyon na ho shadid ke ba'd