sukun-amoz betabi hai furqat mein fughan meri

sukūñ-āmoz betābi hai furqat meñ fuġhāñ merī

Thahartā hai jo dil pahlū meñ jaltī hai zabāñ merī

ḳhamoshī rang paidā kar rahī hai hasrat-e-dil kā

zabān-e-be-zabānī kah rahī hai dāstāñ merī

tumhīñ ne jab na hāl-e-bekasī-e-ġham sunā merā

mujhe ummīd kyā fariyād sun le āsmāñ merī

bayān-e-be-kasī par aa na jaa.e rahm kyā ma.anī

kisī din sun to lo tum dil lagā kar dāstāñ merī

banā 'taufīq' mil kar naqsh-e-hastī-o-adam merā

kaTī dam-bhar meñ mānind-e-sharar umr-e-ravāñ merī

sukun-amoz betabi hai furqat mein fughan meri

Thaharta hai jo dil pahlu mein jalti hai zaban meri

KHamoshi rang paida kar rahi hai hasrat-e-dil ka

zaban-e-be-zabani kah rahi hai dastan meri

tumhin ne jab na haal-e-bekasi-e-gham suna mera

mujhe ummid kya fariyaad sun le aasman meri

bayan-e-be-kasi par aa na jae rahm kya mani

kisi din sun to lo tum dil laga kar dastan meri

bana 'taufiq' mil kar naqsh-e-hasti-o-adam mera

kaTi dam-bhar mein manind-e-sharar umr-e-rawan meri