sukun-e-dil abhi laun kahan se

sukūn-e-dil abhī lā.ūñ kahāñ se

mujhe fursat nahīñ āh-o-fuġhāñ se

bahut hai kāhish-e-dard-e-mohabbat

hameñ kyā vāsta aish-e-jahāñ se

na pūchho mājrā-e-shauq ham se

kahīñ laġhzish na ho jaa.e zabāñ se

karam un kā tire hāl-e-zabūñ par

magar ye baat bāhar hai gumāñ se

abhī shar aur aafat to hai baaqī

sharāfat uTh ga.ī lekin jahāñ se

nasīhat bazm-e-vā.iz meñ huī thī

adab sīkhā magar bazm-e-butāñ se

ḳhabar hai un ko harf-e-mudda.ā kī

bhalā ham kyoñ kaheñ apnī zabāñ se

hai kaisī raushnī sahn-e-chaman meñ

girī hai barq shāyad āsmāñ se

na bar aa.ī tamanna dil kī 'nāsir'

uThe ham nā-murādāna jahāñ se

sukun-e-dil abhi laun kahan se

mujhe fursat nahin aah-o-fughan se

bahut hai kahish-e-dard-e-mohabbat

hamein kya wasta aish-e-jahan se

na puchho majra-e-shauq hum se

kahin laghzish na ho jae zaban se

karam un ka tere haal-e-zabun par

magar ye baat bahar hai guman se

abhi shar aur aafat to hai baqi

sharafat uTh gai lekin jahan se

nasihat bazm-e-waiz mein hui thi

adab sikha magar bazm-e-butan se

KHabar hai un ko harf-e-muddaa ki

bhala hum kyon kahen apni zaban se

hai kaisi raushni sahn-e-chaman mein

giri hai barq shayad aasman se

na bar aai tamanna dil ki 'nasir'

uThe hum na-muradana jahan se