sukun-e-dil kisi rangin ada ne luT liya

sukūn-e-dil kisī rangīñ adā ne luuT liyā

sitam hai apne chaman ko ḳhizāñ ne luuT liyā

jo zarra thā vo tajallī meñ barq-e-aiman thā

nazar paḌī thī ki us barq-adā ne luuT liyā

kahāñ kī tauba-o-tā.at kahāñ kī rusvā.ī

matā.a-e-zohd ko uTh kar ghaTā ne luuT liyā

qafas meñ bhī na bachī jaan ġham-nasīboñ kī

yahāñ bhī mauj-e-nasīm-o-sabā ne luuT liyā

sitam ke baad to imkāñ nahīñ hai shikve kā

vo kyā kare jise terī vafā ne luuT liyā

tajalliyoñ ko kahe kaun jab do-ālam ko

tire hijāb kī dilkash adā ne luuT liyā

kahūñ maiñ is ke sivā apnā haal kyā 'shabbīr'

vafā-parast ko ik bevafā ne luuT liyā

sukun-e-dil kisi rangin ada ne luT liya

sitam hai apne chaman ko KHizan ne luT liya

jo zarra tha wo tajalli mein barq-e-aiman tha

nazar paDi thi ki us barq-ada ne luT liya

kahan ki tauba-o-taat kahan ki ruswai

mataa-e-zohd ko uTh kar ghaTa ne luT liya

qafas mein bhi na bachi jaan gham-nasibon ki

yahan bhi mauj-e-nasim-o-saba ne luT liya

sitam ke baad to imkan nahin hai shikwe ka

wo kya kare jise teri wafa ne luT liya

tajalliyon ko kahe kaun jab do-alam ko

tere hijab ki dilkash ada ne luT liya

kahun main is ke siwa apna haal kya 'shabbir'

wafa-parast ko ek bewafa ne luT liya