سکون دل میسر ہو مقام ایسا کہاں ہوگا

سکون دل میسر ہو مقام ایسا کہاں ہوگا

جہاں ٹھہرو گے سر پر حسرتوں کا سائباں ہوگا

لیے پھرتے ہیں ہاتھوں میں یہاں کچھ لوگ کیوں پتھر

ضرور ان بستیوں میں کوئی شیشے کا مکاں ہوگا

نہ بدلا اب بھی دستور تعلق وقت کے ہاتھوں

رقیبوں سے تمہیں اب بھی رفاقت کا گماں ہوگا

تم اپنی کوششوں سے کوہکن بن جاؤ گے لیکن

ضروری تو نہیں کہ دودھ کا دریا رواں ہوگا

یہ آنکھیں آئنے ہیں دل کے ان پر تم یقیں رکھنا

زباں جو کہہ نہ پائے گی ان آنکھوں سے بیاں ہوگا

بنو تم شائق انسانیت گوہرؔ جہاں تک ہو

زمیں ہوگی تمہاری اور تمہارا آسماں ہوگا