sukun-e-dil mayassar ho maqam aisa kahan hoga

sukūn-e-dil mayassar ho maqām aisā kahāñ hogā

jahāñ Thahroge sar par hasratoñ kā sā.ebāñ hogā

liye phirte haiñ hāthoñ meñ yahāñ kuchh log kyoñ patthar

zarūr in bastiyoñ meñ koī shīshe kā makāñ hogā

na badlā ab bhī dastūr-e-ta'alluq vaqt ke hāthoñ

raqīboñ se tumheñ ab bhī rifāqat kā gumāñ hogā

tum apnī koshishoñ se kohkan ban jāoge lekin

zarūrī to nahīñ ki duudh kā dariyā ravāñ hogā

ye āñkheñ aa.ine haiñ dil ke in par tum yaqīñ rakhnā

zabāñ jo kah na pā.egī in āñkhoñ se bayāñ hogā

bano tum shā.eq-e-insāniyat 'gauhar' jahāñ tak ho

zamīñ hogī tumhārī aur tumhārā āsmāñ hogā

sukun-e-dil mayassar ho maqam aisa kahan hoga

jahan Thahroge sar par hasraton ka saeban hoga

liye phirte hain hathon mein yahan kuchh log kyon patthar

zarur in bastiyon mein koi shishe ka makan hoga

na badla ab bhi dastur-e-ta'alluq waqt ke hathon

raqibon se tumhein ab bhi rifaqat ka guman hoga

tum apni koshishon se kohkan ban jaoge lekin

zaruri to nahin ki dudh ka dariya rawan hoga

ye aankhen aaine hain dil ke in par tum yaqin rakhna

zaban jo kah na paegi in aankhon se bayan hoga

bano tum shaeq-e-insaniyat 'gauhar' jahan tak ho

zamin hogi tumhaari aur tumhaara aasman hoga