sukun-e-dil mein wo ban ke jab intishaar utra to maine dekha

sukūn-e-dil meñ vo ban ke jab intishār utrā to maiñ ne dekhā

na dekhtā par lahū meñ vo baar baar utrā to maiñ ne dekhā

na āñsuoñ hī meñ vo chamak thī na dil kī dhaḌkan meñ vo kasak thī

sahar ke hote hī nashsha-e-hijr-e-yār utrā to maiñ ne dekhā

udaas āñkhoñ se tak rahā thā mujhe vo chhūTā huā kinārā

shikasta kashtī se jab maiñ dariyā ke paar utrā to maiñ ne dekhā

jo barf āñkhoñ meñ jam chukī thī vo dhīre dhīre pighal rahī thī

jab aa.ine meñ vo merā ā.īna-dār utrā to maiñ ne dekhā

the jitne vahm-o-gumān vo sab na.ī haqīqat meñ Dhal chuke the

ik aadmī par kalām-e-parvardigār utrā to maiñ ne dekhā

na jaane kab se sisak rahā thā qarīb aate jhijak rahā thā

makāñ kī dahlīz se vo jab ashk-bār utrā to maiñ ne dekhā

ḳhayāl-e-jānāñ tirī badaulat 'farāz' hai kitnā ḳhūb-sūrat

dimāġh-o-dil se haqīqatoñ kā ġhubār utrā to maiñ ne dekhā

sukun-e-dil mein wo ban ke jab intishaar utra to main ne dekha

na dekhta par lahu mein wo bar bar utra to main ne dekha

na aansuon hi mein wo chamak thi na dil ki dhaDkan mein wo kasak thi

sahar ke hote hi nashsha-e-hijr-e-yar utra to main ne dekha

udas aankhon se tak raha tha mujhe wo chhuTa hua kinara

shikasta kashti se jab main dariya ke par utra to main ne dekha

jo barf aankhon mein jam chuki thi wo dhire dhire pighal rahi thi

jab aaine mein wo mera aaina-dar utra to main ne dekha

the jitne wahm-o-guman wo sab nai haqiqat mein Dhal chuke the

ek aadmi par kalam-e-parwardigar utra to main ne dekha

na jaane kab se sisak raha tha qarib aate jhijak raha tha

makan ki dahliz se wo jab ashk-bar utra to main ne dekha

KHayal-e-jaanan teri badaulat 'faraaz' hai kitna KHub-surat

dimagh-o-dil se haqiqaton ka ghubar utra to main ne dekha