sukun-e-dil na mayassar hua zamane mein

sukūn-e-dil na mayassar huā zamāne meñ

na yaad rakhne meñ tum ko na bhuul jaane meñ

hamesha vus.at-e-aflāk meñ rahā hai ġham

kahāñ qayām hai shāhīñ kā āshiyāne meñ

urūj-e-tīrgī-e-shab se ho sahar paidā

yahī nizām hai duniyā ke kār-ḳhāne meñ

shafaq ke ḳhuun kī surḳhī bhī ho ga.ī shāmil

sahar-ba-dosh sitāroñ ke jhilmilāne meñ

abhī bahār kā kuchh aur intizār karo

ki thoḌī der hai kaliyoñ ke muskurāne meñ

ye vo matā-e-girāñ hai jo mil nahīñ saktī

sukūn-e-dil kī tamannā na kar zamāne meñ

kabhī qarār dil-e-be-qarār ko bhī mile

ilāhī kaun kamī hai tire ḳhazāne meñ

kisī se kuchh bhī shikāyat karūñ to kyā hāsil

milā na koī vafā-āshnā zamāne meñ

guloñ kī bazm hī rañgīniyāñ ba-dosh nahīñ

har ek naqsh hasīñ hai nigār-ḳhāne meñ

meñ rauñdtā huā kāñToñ ko yuuñ guzartā huuñ

ki rah-ravoñ ko suhūlat ho aane jaane meñ

vo ek tum ho ki tum ko kisī ne kuchh na kahā

vo ek ham haiñ ki rusvā hue zamāne meñ

tire ḳhayāl se aatī nahīñ jo lab pe mire

vahī to kaam kī ik baat thī fasāne meñ

vo iztirāb-e-musalsal kā lutf kyā jaane

musībatoñ se jo ghabrā gayā zamāne meñ

kuchh andalīb kā ḳhuun jigar bhī hai shāmil

guloñ kī bazm kī rañgīniyāñ baḌhāne meñ

hamīñ to lazzat-e-āzār ke nahīñ ḳhūgar

unheñ bhī lutf sā aatā hai kuchh satāne meñ

qusūr un kī nigāhoñ kī shoḳhiyoñ kā bhī hai

hamārī jur.at-e-shauq-o-talab baḌhāne meñ

rahegā muddatoñ charchā mirā zabānoñ par

kisī kī bazm se 'anvār' uTh ke jaane meñ

sukun-e-dil na mayassar hua zamane mein

na yaad rakhne mein tum ko na bhul jaane mein

hamesha wusat-e-aflak mein raha hai gham

kahan qayam hai shahin ka aashiyane mein

uruj-e-tirgi-e-shab se ho sahar paida

yahi nizam hai duniya ke kar-KHane mein

shafaq ke KHun ki surKHi bhi ho gai shamil

sahar-ba-dosh sitaron ke jhilmilane mein

abhi bahaar ka kuchh aur intizar karo

ki thoDi der hai kaliyon ke muskurane mein

ye wo mata-e-giran hai jo mil nahin sakti

sukun-e-dil ki tamanna na kar zamane mein

kabhi qarar dil-e-be-qarar ko bhi mile

ilahi kaun kami hai tere KHazane mein

kisi se kuchh bhi shikayat karun to kya hasil

mila na koi wafa-ashna zamane mein

gulon ki bazm hi ranginiyan ba-dosh nahin

har ek naqsh hasin hai nigar-KHane mein

mein raundta hua kanTon ko yun guzarta hun

ki rah-rawon ko suhulat ho aane jaane mein

wo ek tum ho ki tum ko kisi ne kuchh na kaha

wo ek hum hain ki ruswa hue zamane mein

tere KHayal se aati nahin jo lab pe mere

wahi to kaam ki ek baat thi fasane mein

wo iztirab-e-musalsal ka lutf kya jaane

musibaton se jo ghabra gaya zamane mein

kuchh andalib ka KHun jigar bhi hai shamil

gulon ki bazm ki ranginiyan baDhane mein

hamin to lazzat-e-azar ke nahin KHugar

unhen bhi lutf sa aata hai kuchh satane mein

qusur un ki nigahon ki shoKHiyon ka bhi hai

hamari jurat-e-shauq-o-talab baDhane mein

rahega muddaton charcha mera zabanon par

kisi ki bazm se 'anwar' uTh ke jaane mein