sukun-e-qalb gaya ruh ka qarar gaya

sukūn-e-qalb gayā ruuh kā qarār gayā

vo kyā ga.e ki zamāne kā e.atibār gayā

tumhāre naam pe ro lenā aah bhar lenā

Dhalī jo umr to jazboñ kā sab ḳhumār gayā

maiñ daf.atan laraz uThtā huuñ jab ye sochtā huuñ

ki umr kaise tire hijr meñ guzār gayā

ye irtiqā-e-zamāna ki daur-e-pastī hai

ki jis meñ pyaar vafā sab kā e.atibār gayā

ye kis ne ā.ina-e-zīst ko jilā baḳhshī

ye kaun kākul-e-hastī ko phir sañvār gayā

shikast ishq meñ hotī to darguzar kartā

maiñ bad-nasīb magar dostī meñ haar gayā

kisī se jab bhī kisī kī jafā kā zikr sunā

mirā ḳhayāl tirī samt baar baar gayā

bisāt-e-ishq kī chāleñ 'salīm' thiiñ hī ajiib

jo jīt.tā nazar aaya vo ḳhud ko haar gayā

sukun-e-qalb gaya ruh ka qarar gaya

wo kya gae ki zamane ka eatibar gaya

tumhaare nam pe ro lena aah bhar lena

Dhali jo umr to jazbon ka sab KHumar gaya

main dafatan laraz uThta hun jab ye sochta hun

ki umr kaise tere hijr mein guzar gaya

ye irtiqa-e-zamana ki daur-e-pasti hai

ki jis mein pyar wafa sab ka eatibar gaya

ye kis ne aaina-e-zist ko jila baKHshi

ye kaun kakul-e-hasti ko phir sanwar gaya

shikast ishq mein hoti to darguzar karta

main bad-nasib magar dosti mein haar gaya

kisi se jab bhi kisi ki jafa ka zikr suna

mera KHayal teri samt bar bar gaya

bisat-e-ishq ki chaalen 'salim' thin hi ajib

jo jitta nazar aaya wo KHud ko haar gaya