sukun-e-qalb ho tum ruh ka qarar ho tum

sukūn-e-qalb ho tum ruuh kā qarār ho tum

mirī hayāt-e-mohabbat ke rāzdār ho tum

nigāh-e-nāz se luuTe haiñ mere qalb-o-jigar

asīr-e-zulf kiyā us ke zimmedār ho tum

mire zamīr ne samjhā mirī nazar ne kahā

mirī talab ke liye husn-e-intizār ho tum

sukūn-e-qalb milā hai hamārī mahfil meñ

mirī nigāh kā markaz ho mere yaar ho tum

judā judā haiñ nigāheñ judā judā hai ḳhayāl

mirī nigāh meñ bas shān-e-kirdgār ho tum

mire chaman kī tabāhī kisī ko kyā ma.alūm

ḳhizāñ-rasīda chaman kī mire bahār ho tum

jahāñ meñ apne parā.e sabhī muḳhālif haiñ

'ġhubār' ġham meñ magar mere ġham-gusār ho tum

sukun-e-qalb ho tum ruh ka qarar ho tum

meri hayat-e-mohabbat ke raazdar ho tum

nigah-e-naz se luTe hain mere qalb-o-jigar

asir-e-zulf kiya us ke zimmedar ho tum

mere zamir ne samjha meri nazar ne kaha

meri talab ke liye husn-e-intizar ho tum

sukun-e-qalb mila hai hamari mahfil mein

meri nigah ka markaz ho mere yar ho tum

juda juda hain nigahen juda juda hai KHayal

meri nigah mein bas shan-e-kirdgar ho tum

mere chaman ki tabahi kisi ko kya malum

KHizan-rasida chaman ki mere bahaar ho tum

jahan mein apne parae sabhi muKHalif hain

'ghubar' gham mein magar mere gham-gusar ho tum