sukun-e-qalb mayassar kise jahan mein hai

sukūn-e-qalb mayassar kise jahān meñ hai

tirī zamīñ meñ kahāñ vo jo āsmān meñ hai

mazā hayāt kā us shaḳhs se kabhī pūchho

jo tez dhuup kī chādar ke sā.ebān meñ hai

palak se TuuT ke jab ashk ḳhaak meñ mil jaa.e

samajh lo tab ye ġharīb-ul-vatan amaan meñ hai

mujhe bhī gūñgā banā.eñge ek din ye log

mahal kā aib jo poshīda is zabān meñ hai

vafā ḳhulūs mohabbat bhī bik rahe haiñ miyāñ

har ek chiiz mayassar mirī dukān meñ hai

usī kī zaat se is ghar kī bach ga.ī izzat

jo khoTe sikke kī mānind ḳhāndān meñ hai

biThā diye haiñ kisī ne havāoñ par pahre

tabhī to itnī ghuTan jism ke makān meñ hai

bichhaḌte vaqt jo tum ne kahā thā mujh se kabhī

vo jumla aaj bhī mahfūz mere kaan meñ hai

sukun-e-qalb mayassar kise jahan mein hai

teri zamin mein kahan wo jo aasman mein hai

maza hayat ka us shaKHs se kabhi puchho

jo tez dhup ki chadar ke saeban mein hai

palak se TuT ke jab ashk KHak mein mil jae

samajh lo tab ye gharib-ul-watan aman mein hai

mujhe bhi gunga banaenge ek din ye log

mahal ka aib jo poshida is zaban mein hai

wafa KHulus mohabbat bhi bik rahe hain miyan

har ek chiz mayassar meri dukan mein hai

usi ki zat se is ghar ki bach gai izzat

jo khoTe sikke ki manind KHandan mein hai

biTha diye hain kisi ne hawaon par pahre

tabhi to itni ghuTan jism ke makan mein hai

bichhaDte waqt jo tum ne kaha tha mujh se kabhi

wo jumla aaj bhi mahfuz mere kan mein hai