sukun-e-qalb nihan hai hasin nazaron mein

sukūn-e-qalb nihāñ hai hasīñ nazāroñ meñ

mohabbatoñ ke haiñ paiġhām ābshāroñ meñ

na pūchh hijr ke māroñ kā hāl-e-dil ham se

azaab sahte haiñ tanhā.ī kā bahāroñ meñ

har ek mauj meñ hangāma hai qayāmat kā

sukūt kitnā hai dekho zarā kināroñ meñ

kisī bhī taur ye bilkul sanad nahīñ bantī

baḌhā ke pesh jo karte haiñ ishtihāroñ meñ

kuchh is mizāj se jīvan yahāñ guzārā hai

hamārā naam bhī aa.egā ḳhāksāroñ meñ

use bhī ham to ġhanīmat hī jānte haiñ aaj

'nazar' jo aate haiñ do chaar ġham-gusāroñ meñ

hamārā sab se baḌā alamiya yahī to hai

ye dahr baT jo gayā hai ka.ī hisāroñ meñ

zarūrī kyā hai har ik baat khul ke kahne kī

batāyā kījiye kuchh kuchh 'nazar' ishāroñ meñ

sukun-e-qalb nihan hai hasin nazaron mein

mohabbaton ke hain paigham aabshaaron mein

na puchh hijr ke maron ka haal-e-dil hum se

azab sahte hain tanhai ka bahaaron mein

har ek mauj mein hangama hai qayamat ka

sukut kitna hai dekho zara kinaron mein

kisi bhi taur ye bilkul sanad nahin banti

baDha ke pesh jo karte hain ishtihaaron mein

kuchh is mizaj se jiwan yahan guzara hai

hamara nam bhi aaega KHaksaron mein

use bhi hum to ghanimat hi jaante hain aaj

'nazar' jo aate hain do chaar gham-gusaron mein

hamara sab se baDa alamiya yahi to hai

ye dahr baT jo gaya hai kai hisaron mein

zaruri kya hai har ek baat khul ke kahne ki

bataya kijiye kuchh kuchh 'nazar' ishaaron mein