sukun-e-zist bhi khona koi mazaq nahin

sukūn-e-zīst bhī khonā koī mazāq nahīñ

ġhazal meñ dard pironā koī mazāq nahīñ

ye dil nikāl ke rakhnā tū pahle kāġhaz par

phir āñsuoñ se bhigonā koī mazāq nahīñ

kisī kī niiñd uḌānā to phir bhī āsāñ hai

magar sukūn se sonā koī mazāq nahīñ

safar hayāt kā chalnā hai jaise sho'loñ par

ġhamoñ ke bojh ko Dhonā koī mazāq nahīñ

lahū tamām hī ashkoñ meñ Dhaltā jaatā hai

kisī kī yaad meñ ronā koī mazāq nahīñ

ḳhushī nasīb meñ sab ke likhī nahīñ hotī

hasīn ḳhvāb sañjonā koī mazāq nahīñ

liyā mazāq meñ jis ne gayā vo duniyā se

kahā thā maiñ ne corona koī mazāq nahīñ

ye shā'irī hai tamāsha nahīñ koī sāhib

lahū se aañkh kā dhonā koī mazāq nahīñ

naqāb oḌh le koī 'nazar' sharāfat kā

magar sharīf bhī honā koī mazāq nahīñ

sukun-e-zist bhi khona koi mazaq nahin

ghazal mein dard pirona koi mazaq nahin

ye dil nikal ke rakhna tu pahle kaghaz par

phir aansuon se bhigona koi mazaq nahin

kisi ki nind uDana to phir bhi aasan hai

magar sukun se sona koi mazaq nahin

safar hayat ka chalna hai jaise sho'lon par

ghamon ke bojh ko Dhona koi mazaq nahin

lahu tamam hi ashkon mein Dhalta jata hai

kisi ki yaad mein rona koi mazaq nahin

KHushi nasib mein sab ke likhi nahin hoti

hasin KHwab sanjona koi mazaq nahin

liya mazaq mein jis ne gaya wo duniya se

kaha tha main ne corona koi mazaq nahin

ye sha'iri hai tamasha nahin koi sahib

lahu se aankh ka dhona koi mazaq nahin

naqab oDh le koi 'nazar' sharafat ka

magar sharif bhi hona koi mazaq nahin