سکون زیست بھی کھونا کوئی مذاق نہیں

سکون زیست بھی کھونا کوئی مذاق نہیں

غزل میں درد پرونا کوئی مذاق نہیں

یہ دل نکال کے رکھنا تو پہلے کاغذ پر

پھر آنسوؤں سے بھگونا کوئی مذاق نہیں

کسی کی نیند اڑانا تو پھر بھی آساں ہے

مگر سکون سے سونا کوئی مذاق نہیں

سفر حیات کا چلنا ہے جیسے شعلوں پر

غموں کے بوجھ کو ڈھونا کوئی مذاق نہیں

لہو تمام ہی اشکوں میں ڈھلتا جاتا ہے

کسی کی یاد میں رونا کوئی مذاق نہیں

خوشی نصیب میں سب کے لکھی نہیں ہوتی

حسین خواب سنجونا کوئی مذاق نہیں

لیا مذاق میں جس نے گیا وہ دنیا سے

کہا تھا میں نے کرونا کوئی مذاق نہیں

یہ شاعری ہے تماشہ نہیں کوئی صاحب

لہو سے آنکھ کا دھونا کوئی مذاق نہیں

نقاب اوڑھ لے کوئی نظرؔ شرافت کا

مگر شریف بھی ہونا کوئی مذاق نہیں