sukun-e-zindagi hasil nahin hai

sukūn-e-zindagī hāsil nahīñ hai

abhī banda kisī qābil nahīñ hai

masā.ib se gurezāñ hone vaale

vo kyā insān jis ke dil nahīñ hai

samajhtā ho jo ḳhud ko sab se qābil

yaqīnan vo kisī qābil nahīñ hai

mohabbat lab pe ho aur dil meñ nafrat

mirī tīnat meñ ye shāmil nahīñ hai

ma.āl-e-kashtī-o-tūfāñ na pūchho

ye lagtā hai kahīñ sāhil nahīñ hai

jise chāho jahāñ barbād kar do

tumheñ āsān hai mushkil nahīñ hai

kisī bhī shaḳhs se nafrat baratnā

mire ādāb meñ dāḳhil nahīñ hai

koī itnā batā de zālimoñ ko

ḳhudā mazlūm se ġhāfil nahīñ hai

jahāñ shākī hai tujh se ai mire dost

nahīñ hai koī to 'manzil' nahīñ hai

sukun-e-zindagi hasil nahin hai

abhi banda kisi qabil nahin hai

masaib se gurezan hone wale

wo kya insan jis ke dil nahin hai

samajhta ho jo KHud ko sab se qabil

yaqinan wo kisi qabil nahin hai

mohabbat lab pe ho aur dil mein nafrat

meri tinat mein ye shamil nahin hai

maal-e-kashti-o-tufan na puchho

ye lagta hai kahin sahil nahin hai

jise chaho jahan barbaad kar do

tumhein aasan hai mushkil nahin hai

kisi bhi shaKHs se nafrat baratna

mere aadab mein daKHil nahin hai

koi itna bata de zalimon ko

KHuda mazlum se ghafil nahin hai

jahan shaki hai tujh se ai mere dost

nahin hai koi to 'manzil' nahin hai